Nga Redaksia:
Kryeministri Edi Rama ka reaguar me nervozizëm të hapur pas vendimit të Gjykatës Kushtetuese, e cila la në fuqi pezullimin e Belinda Ballukut, zëvendëskryeministre dhe ministre e Infrastrukturës. Në një dalje publike në podcast-in e tij, Rama e quajti vendimin “të paparë dhe të padëgjuar”, duke akuzuar Gjykatën Kushtetuese se po “merr peng qeverinë”.
Ky reagim nuk është thjesht një shpërthim emocional, por një përpjekje e qartë për ta paraqitur kontrollin kushtetues si sulm personal ndaj tij dhe ndaj ekzekutivit. Në thelb, Rama po sulmon një institucion që nuk po i bindet më vullnetit të pushtetit politik.
Ky është goli i dytë që kryeministri pëson nga Gjykata Kushtetuese. I pari ishte rasti i Erion Veliajt, ku gjykata rrëzoi qëndrime dhe praktika të qeverisë, duke vendosur kufij të qartë mes pushteteve. I dyti vjen tani me Belinda Ballukun, një nga figurat më të fuqishme të kabinetit Rama, e lidhur drejtpërdrejt me tendera miliardësh dhe projekte strategjike.
Vendimi i Gjykatës Kushtetuese nuk është politik, por ligjor. Ai bazohet në procedura dhe në nevojën për të garantuar korrektësinë, transparencën dhe respektimin e ligjit, veçanërisht në sektorë të ndjeshëm si infrastruktura dhe prokurimet publike. Pezullimi i Ballukut është një masë që synon të sigurojë që proceset të hetohen pa ndikim politik dhe pa presion nga pushteti ekzekutiv.
Reagimi i Ramës bie në kontradiktë të fortë me imazhin që ai ka ndërtuar për vite me radhë si “arkitekt” dhe “mbështetës” i reformës në drejtësi. Në momentin që drejtësia merr vendime që prekin njerëzit e tij më të afërt, ajo shpallet armike, e pabesueshme dhe “pengmarrëse”.
Në realitet, ajo që Rama po përpiqet të bëjë është delegjitimimi i pavarësisë së gjyqësorit. Çdo kontroll institucional mbi qeverinë po paraqitet si sulm personal ndaj kryeministrit. Ky është një model i rrezikshëm, i njohur në regjime ku pushteti kërkon të jetë mbi ligjin.
Gjykata Kushtetuese ka bërë pikërisht atë që i takon: ka zbatuar ligjin dhe ka vendosur kufij. Vendimi i saj nuk është arbitrar, por një mekanizëm mbrojtës për shtetin e së drejtës dhe për qytetarët, që qeverisja të mos kthehet në sundim të pakontrolluar.
Dy gola nga e njëjta gjykatë nuk janë rastësi. Janë sinjal i qartë se drejtësia, sado e sulmuar, ende po reziston. Dhe kjo është pikërisht ajo që e shqetëson më shumë kryeministrin.